Zutaten
- Gruaße Zwiefen
- Maishendlbrist
- Katoffen
- Gmischts Gemüse wia da vikimb
- Getrocknete Rosmarinblattl
- Measoiz aus da Mühle
- Schworzn Pfeffa aus da Mühle
- Cayennepfeffa
- Olivnöl
- Rapsöl
- Gemüsebrühe
Zubereitung
De Rosmarin-Katoffen
Fe de Rosmarin-Katoffen hobi Katoffen gwoschn und in Spoitn gschniedn. Natüalich ku si a jeda söwa aussuachn, wia gruaß de Spoitn wean soin, dabei muas ma hoid beochtn, dass dickare Spoitn länga brauchn, bis durch san. As real auf 200 °C vuahoazn.
Nochad de Katoffespoitn auf am Bockblech vateiln und mit Olivnöl benetzn, do brauchst a ned am Öl sporn. Danoch mit a bissl Soiz und Pfeffa würzn und mid de trickadn Rosmarinblattl bestreun. Wennst an Rosmarin ned gonz so intensiv hom megst, kust a de gonzn Zweige dazualeng, und danoch wieda wecktoa, donn muast an Rosmarin no ned midessn. Zusätzlich kust a Chilis oda Lorbeerblattl dazuatoa, de hob i in dem Rezept hoid ned heagnomma. Jetz de Katoffen in vuakoaztn Bockofn toa. Je nochdem wia dick de Spoitn etz san, is hoid a de Garzeit a ondare – am bestn zwischndurch med ana Gowe probian. I hobs fe ca. 20 Minutn drin kob.
As Mischgemüse
In mein Foi hobi Tiefkühl-Gemüse heagnomma, weili zfaul wor, as Gemüse heazrichtn. Wennst die owa fe de Premium-Variante entscheidn und dei Gmias frisch zuabereitn megst, mochi a boid an Beitrog zum Garen vo untaschiedlichstem Gemüse. Zu dem Gericht passt zum Beispiel sea guad Wurzelgemüse wia Karottn oda Knollensellerie, Mais oda Brokkoli. Owa wia gsog, aufpassn auf de untaschiedlichn Garzeitn. Sust oafoch as Tiefkühlgemüse lt. Vapockung zuabereitn.
De Zwiefe-Maishendlbrist
Gnuag gruaße Zwiefen schön, hoibian und in Scheim schnein. Wennst an Tipp host, wosma gengs Blean toa ku, dadi mi gfrein, wennst ma a Nochricht schickst. Donn de Maishendlbrist woschn und vo iwaschüssigm Fett und Sehnen befrein. Nochad de Maishendlbrist auf oana Seit mit Soiz und Pfeffa würzen. Wennst des med oi Trimma gmocht host, kust as Fleisch umdrahn und auf da ondan Seit min Cayennepfeffa würzn. Des lossma etz oafoch so long ziachn, bis de Zwiefen fertig san – oiso fongma doch glei med dena u.
Jetz ina gruaßn Pfonn a Rapsöl bei mittlara Temperatur erhitzn und no de Zwiefen so long uschwitzn, bis glosig san. Nochad de Zwiefe in da gleichn Pfoff auf de Seitn schiam und de Temperatur auf huach stöhn. De Maishendlbrist zeascht auf da Soiz-Pfeffa-seit ubrotn und de Zwifen iwa de ondre Seit toa, dass de Hendlbrist sche bedeckt san. Boist di do a bissl schwar tuasd, i hu zeascht de oane Höfte vo de Hendlbrist in de Pfonn tu, de Zwiefen komplett auf dena vateilt und donn de zwoate Höfte dazuagem. De Zwiefen tamma desweng driwa, dass nu a bissl weidagaren kenan und donn a nu teilweis a schene Bräunung durch de hechare Hitz griang. Noch a poor Minutn wendn und nu amoi kurz auf da Cayennepfeffer-Seitn ubrotn. Donn moit da Gemüsebrühe oblöschn. I hob ca. 200 ml heagnomma, sodass de Hendlbrist und da Zwiefe hoid ned komplett schwimman. Des ois nu a bissl ziachn lossn und scho kust savian. Moizeit, an Guadn (wia unsre Nochban song dadn) und vü Spaß beim Nochkochn!